平安夜2009

12月24日(星期四)

今年平安夜, 喺我哋屋企開party. 

出席人數共16人 (我哋一家6口, Irene4口, Philippe3口, 2個missionaires + 奶奶). 其實本應仲有Dominique同Lilly, 不過佢哋之前鬧大交, 所以Dominique冇嚟到, 而Lilly應該係同奶奶鬧交啦! 兩個人都眼濕濕又眼紅紅咁, 佢推咗奶奶入屋後不久就走, 話唔想影響我哋個氣氛喎!!! 其實都真係幾冇隠...  

食物方面, 有我整o既春捲同炒麵, Grégory買o既燒鴨, Windy整o既Lazane, 同Lilly買o既蝸牛, canapée and 菜. 都算幾豐富.

我哋冇特別點慶祝呢個平安夜, 只係各自各精彩, 大人有大人傾偈, 小朋友有小朋友喺樓上玩...... 只係至在大家聚一聚.

不過今年冇做到一件往年例必會做o既事, 就係 --- 唱聖誕歌喇!!! 點解? 皆因奶奶同Philippe3口都好遲嚟囉!!! 成九點先可以開餐, 餓c班小朋友.... 平時成日叫我哋早d早d, 今次唔關我哋事呀!!!  

奶奶 + 7個孫仔孫女

大合照

平安夜o既天慰妹妹

天樂剪頭髮

12月23日(星期三)

又到咗天樂剪頭髮既時候喇!!!

長到好似隻公雞仔咁....

其實佢好唔鐘意剪髮, 睇吓佢個樣就知, 又成日問: "得未呀???"

就得喇 !! 咪郁啦 !!!

話咁快就剪完啦 !! 幾靚仔.....

連涼都沖埋, 醒目晒!!!

學校聖誕禮物 2009

12月18日(星期五)

返埋今日, 學校又開始放兩星期的聖誕新年假.

以前喺Le Mée間幼稚園, 放聖誕假前一定有聖誕老人派禮物俾d小朋友.

Cesson呢度就冇聖誕老人, 但係學校老師都準備咗d禮物仔, 當中有糖, 餅仔, 朱古力, 聖誕卡..... 天欣仲有個自製o既索袋仔, 都幾靚o架!!!

天樂禮物包, 個圓筒都係自製o架, 好靚!! 用嚟裝住全部d東東, 有一袋餅仔, 一個聖誕老人朱古力, 一個熊仔蠟燭坐, 一串luttin公仔. 

天欣禮物包, 就係呢個聖誕老人索袋仔喇 !! 好靚好得意... 個袋裝有個聖誕老人朱古力, 同一袋朱古力杏仁餅仔, 好好味... yumyum...

天悅可能因為已經係小學二年級, 冇好多時間做勞作, 只得一條朱古力餅, 三粒糖同一張聖誕卡, 不過張卡都ok吖, 雖然簡單, 但好有氣氛. 

喺度衷心多謝呢班為小朋友花咗咁多心思同時間o既老師們

2009-2010年度學校相片

12月17日(星期五)

2009-2010學年的學校相片, 喺10月30日影完, 12月中終於派返嚟!!!

今年共有四套相片, 因為多咗天欣嘛!!!

影得都算ok, 可惜冇天欣單人相, 應該係學校搞錯, 我有投訴架....

個老師話因為我係"tak"咗只同兄弟姊妹影... 之後我check返個紀錄...

唔係喎!! 我係"tak"咗單人同與兄弟姊妹合照喎.....屈我.....!!!!!! 豈有此理!!!

唉!! 不過算啦, 都已經影完, 想追都追唔返. 只係覺得俾天欣好可惜囉.  

天悅 CE1

天樂 Moyenne Section

天欣 Petite Section

天悅 + 天樂 + 天欣

落雪呀!!!

12月17日(星期四)

今朝準備同三隻馬騮出門返學時, 打開窗簾望望天氣,

嘩!!! 落雪呀!!! 好興奮呀!!!

第一日落雪, 就落得好犀利, 成地積滿雪.

雖然係好靚, 不過其實揸車會好危險. 我都 "線" 咗三次, 好在揸得夠慢.

推天慰去接返三隻馬騮時, 足足用多咗一倍時間, 因為厚雪啜住d轆仔, 又難推又難行.

 

四小福 --- 睇燈飾

12月11日(星期五)

聖誕將至, 好多隔離鄰舍的門口都佈置得好靚.

尤其係一入黑, 個個都著晒閃燈, 真係好有氣氛...

所以帶咗四小福出去"睇燈飾"

其實好想將全部都影低, 可惜出來的效果同現場真係差好遠,

所以只影咗幾間夠光猛的在電腦慢慢欣賞...!!!