六個月

2011年10月14日(星期五)

 
六個月大o既天禧, 最大o既進步, 相信都係開始學坐喇!!! 好嘢, 希望好快就會冇咁黐身, good!! 真係諗起都興奮呀!!

自從响center parc返嚟嗰晚開始, 我決定唔再陪公主訓覺. 到時到候, 就放佢入自己張床仔, 講完bonne nuit, fait完bisous就刪門走人.... 當然, 會聽到一輪嚎哭, 都要好一段時間先會安靜. 不過濠哭時間好似一晚比一晚短. Bien....   所以我而家夜晚多咗d時間用, 輕鬆咗好多. 可惜佢仲未可以一晚訓到天光, 每晚好準時响三點幾就會喊, 真係同鬧鐘冇乜分別.
  

BB有便便呀

2011年10月2日(星期日)

近排覺得天禧好似瘦左d, 可能淨係飲奶唔夠飽, 又好快肚仔餓. 所以呢個星期初, 開始煮糊仔俾佢食. 由於係半固體食物, 食左幾日, 都冇便便痾.

其實都知道佢好辛苦, 因為有時聽到佢個肚仔"咕咕"聲, 有時又一路大喊一路將個身扭來扭去.... 五日喇, 五日都冇便便呀!!!

今日食完晏, 要同佢換片片, 包新片前, 順便响痰罐竇吓, 睇吓有冇o野痾啦.... 見佢好用力咁推呀推, 就知道嚟料喇.....  不過佢痾得好辛苦, 仲喊得好大聲添. 好唔容易先至完事. 見到佢個樣, 就令我諗起生仔時o既辛苦. 唉!!!