換馬桶

2013年4月26日(星期五)

上上個星期日, 樓下個厠所漏水, 原來係條沖水喉裂咗.

終於等到今日老公放假, 可以修理喇!!

本來係條喉爛啫, 正路應該淨係換返另一條喉就ok, 不過因為個馬桶太舊, 郁一郁下面裂埋, 迫於無奈要成套換. 

由於個馬桶採用垂直抽水式, 老公話呢個系統已經好舊款.

E家一般市面上賣嘅, 大部分都係橫向抽水式, 佢話抽水力強過垂直式喎!!  

加上個馬桶係超細碼，所以唔係咁容易買得返...

果然, 行咗三間公司，先至俾我哋搵到咁細, 仲係得一千零一款, 而且比舊嗰個仲要細些少. 

又因為旱有, 價錢亦唔平, 淨係個坐厠, 未包喉同水箱, 都要91€.

橫向抽水式嗰d因為係大路嘢, 平到39€唔駛全包, 真係唔公平呀!!

唯有咁諗 --- 個馬桶細d, 就慳位d囉!!

因為法國嘅屋, 好多都係厠所同沖涼房分開, 通常個厠所都係勁細架!!

所謂寸金尺土, 慳返兩三cm位, 就當係賺咗氹吓自己囉!!

好喇.... 係時候要開工~~~

 

都話個厠所好細架啦!! 冇洗手盆添架!! 所以自己加咗個花灑.

 

因為唔同size, 地下個窿遮唔晒, 所以又要出去買英泥填返佢.

 

 

用咗半日去買, 半日安裝, 終於搞掂喇....  舖返塊地毯, 靚仔晒!!

 

永不過期

2013年4月26日(星期五)

今晚打算食炒麵，習慣攞最快到期嘅用咗先，不過呢包…

係咪永遠唔會過期呢？ 

春回大地

2013年4月24日(星期三)

以前响香港時, 最鍾意嘅季節係秋天, 因為怕熱又怕凍, 秋涼嘅感覺真係爽!!

不過法國凍嘅時間實在長得令人(我)煩厭....

加上搬咗屋後, 自己又開始學吓種瓜瓜菜菜.

所以近呢三四年, 忽然愛上咗春天.

春回大地時, 留意到所有花草樹木都開始標芽, 轉顏色.... 

真係覺得有一年之計在於春嘅感覺.  

呢個時候, 特別喜歡行呢條路 ~~



因為兩旁嘅樹開滿花花, 真係好鬼C靚.

睇真d, 係櫻花嚟架....

搵食

2013年4月20日(星期六)

Elijah六歲生日, 邀請天慰參加佢嘅生日會.



因為佢哋住得較遠, 來回起碼一粒鐘. 如果車天慰去放低佢再返屋企, 等到夠鐘去接返佢, 咁二來二回就要兩粒鐘喇!! 所以我哋決定全家一齊出發, 放低天慰後, 再去buffalo grille開餐, yeah....  好味!!

  

 

 

最開心就梗係班細路啦!!

移苗

2013年4月16日(星期二)

趁今日好天, 要將四棵荷蘭豆同翠玉瓜移苗, 因為佢哋已經生到好長喇!!

係時候要將佢哋分開.

今年唔想種响地, 因為懶得去鋤地, 掹野草, 所以決定用膠箱.

最近亦好鐘意上youtube睇 "square foot gardening"嘅片, 覺得好似好方便同整齊.

所以遲d會試吓揼d木架嚟種嘢.

工具準備好!! 可以開工....

 

只係將泥放入個膠箱, 種入四棵荷蘭豆, easy job, 搞掂!!

 

老公唔知响邊度搵到呢架車仔返嚟, 啱啱好放到個膠箱入去, 咁就用佢嚟種嘢, 方便推去有太陽嘅位置吖嘛!!



一個朋友send咗d有關荷蘭豆種法嘅圖片同資料俾我, 跟書咁講, 俾枝棍仔佢哋欄吓.
分埋翠玉瓜放响上層....

鄰居Claudine話薯仔好容易種, 只需要多淋水, 直至有芽標上嚟, 就可以唔駛再點理, 到時到候就可以掘出嚟食....  搵咗兩隻已經出咗些少芽嘅薯仔擺入泥, 睇吓係咪真嘅先. 

天禧兩歲生日

2013年4月14日(星期日)

我都話咗, 我哋差唔多個個月都開生日會架啦!!

從星期四開始, 不斷聽到人哋話今個星期日會好好天, 仲會有成22度.

相信所有人都好期待, 因為真係凍咗好耐, 陰陰濕濕嘅天氣令人煩厭.

既然天文台都話會好天, 我哋就決定燒野食同天禧慶祝生日啦!!

                              

果然, 一起身望吓個窗, 好大個太陽呀!!

教會結束即刻返屋企準備.

話咁快, 食得喇喂......

眨下眼, 天禧已經變成一個grande fifi, 再唔係bébé喇!! 識行識走, 仲識講好多嘢lu.... 講真吖, 有時好想佢快d長大, 唔駛咁黐身, 另一方面又唔想佢大得咁快, 真係矛盾!!

 

  

細路仔有得玩就最開心, 草地上嘅白色花花, 全部俾佢哋摘晒....

男仔鐘意玩車, 不過似乎天禧都好有興趣喎!!

例牌 = 唱歌仔 + 吹蠟燭 + 食蛋糕 + 拆禮物 =

 

 

今日好開心呀!! 生日快樂天禧!!



再嚟一份禮物.... Hello Kitty puzzle + 填色畫冊

 

幾時都話, 童年時代係最無憂無慮架啦!!