1噸木送到

1月23日(星期六)

前兩日訂咗4stères木(約一噸, 46e/stère), 今日準時12點半運到.

對面兩個鄰居(Yves和Jean-Marc)自動嚟幫手搬落去地下室, 每條木長一米, 大碌嗰d都好重吓, 佢哋每次搬2-3條, 搬咗成個鐘先搬完, 辛苦晒!!!  

當嗰三個男人搬木時, 我就去油個火爐牆壁.

安裝火爐

1月20/21日(星期三/四)

買呢間屋前, 有三大元素係老公好希望有的, 1)有地下室 2)有樹林喺屋後面 3)有火爐..... 結果, 1同2都真係實現咗. 呢日, 我哋就實踐埋第3個元素喇!!!

呢個爐係我哋上網揾咗好多資料, 又行咗好多間舖頭, 先至決定買佢架!!! 點解揀佢? 因為佢好特別, 第一, 靚仔囉!!! 佢係唯一一部入牆, 應該話有牆包住就真, 包住咗就見唔到條喉咁肉酸. 第二, 佢有三個唔同用途o既門, 1係玻璃門半開揚式, 熱力直接湧出, 適合好凍時用. 2係玻璃門密封式, 適合日間用. 3係鋼門密封式, 適合夜晚訓覺時用. 第三, 可以調節入風力. 第四, 最慳木. 第五, 暫時未知....    

起初, 間火爐公司約好21號星期四朝早會開始安裝, 安裝為期一日半, 話遲d會同我哋再確定動工日期, 所以老公請咗21, 22號兩日假. 但過咗成兩個星期都冇佢哋消息, 我再打電話俾佢哋, 今次又話可能星期三下午都可以嚟安, 總之之前會再同我哋確定日期.... (又係呢句).

結果, 20號星期三大清早九點左右, 叮咚.... 門鐘响. MGC嚟安火爐. 吓???   呢間公司真係完全唔serious, 不過好在嚟安爐呢兩位仁兄好專業同好認真, 佢哋由朝做到晚, 完全冇停過手, 只係中午出咗去一個鐘食lunch, 真係值得嘉許.   後生嗰位仁兄話佢屋企都係安咗呢個爐, 佢對個爐有讚冇彈, 真係勁滿意. 我都希望係啦!!!

佢哋o既工序係:

1) 鑽天花窿 , 用嚟過喉.

2) 鑽地窿, 喺地下室個天花板放咗個圓形蓋, 係火爐入風口, 可調節.  

3) 界牆身, 剷走本身o既牆紙同隔熱, 再舖上佢哋o既隔熱板後, 火爐就位.

午餐時間: 12點 ~ 1點, 繼續......

4) 裝屋頂煙囪

5) 駁喉 --- 從煙囪駁到閣樓, 經二樓, 再到火爐頂

6) 嵌內部零件, 如石塊, 鋼枝, 通氣葉....

7) 建牆身包爐 --- 左右兩邊, and前面....

8) 放隔熱棉於周圍, 用石膏板包嵌.

 

四點半, 收工.

第二朝8點半, 送完三隻馬騮返學, 返到屋企門口, 見到鄰居Christine正在開窗, 話佢知今日仲有些少工程要做, 會再鑽牆, 順便問佢借咗三舊木, 準備試爐用, 因為我哋仲未買.

佢話個女訓緊覺, 中午先去返工. 我話希望九點半d人先嚟啦.... 講完88, 行到屋門口, 就見到架工程車駛緊入嚟. 前後唔夠十分鐘, 就開始鑽牆喇 !!! 真係唔好意思, 希望冇嚇親Christine同佢個女啦 !!!

呢朝, 佢哋主要係加多條125mm喉, 同將二樓條喉封板. 大約十一點半, 就大功告成, 功成身退喇 !!! 由於佢哋咁落力, 我哋俾咗20euros做貼士. 

工程完畢後, 要進行大掃除.

下午4點半, 班馬騮放學返嚟, 我哋就進行點火儀式 !!!

天欣搞笑對答 I

1月21日(星期四)

小朋友思想真係好簡單

話說老公問: qui n'a pas de banane?

天欣回答: maman l'a, Marie-Ange l'a, moi l'a, toi l'a....

真係俾佢笑死　

自製果jam

1月19日(星期二)

9點半去到Brigitte屋企, 因為佢會親自示範點做果jam. 雪櫃只有橙, 所以只做橙果jam.

一) 橙先剝皮, 盡量將白色皮批走 (1kg). 切片. 後來Brigitte批多兩隻檸檬俾我.

二) 如果想有d果皮咬吓, 將150g皮洗淨, 白色皮都要刮走, 否則會有苦澀味, 切幼條.

三) 將橙皮條放些少水, 煲15分鐘.

四) 橙和檸檬肉切片(去核). 煲爛至出汁.

五) 每隻玻璃樽和蓋要用熱水淋約五~十秒, 反轉將水滴出備用(不需等到全乾).

六) 一公斤橙+2隻檸檬o既份量, 要放1.7公斤糖. 先量出700克糖放在碗內, 再從碗內取2湯匙糖放入另一碗仔+一包vitpris拌勻 (無vitpris都ok).

七) 橙皮條水煲好後, 全部倒落橙肉煲內一齊煮.

八) 邊煮邊拌勻, 煮到開始起泡泡計時三分鐘, 後再落另外700克糖, 再煮到起泡泡.

九) 將剩下一公斤糖全放入, 煮到起泡泡後再計時三分鐘, 關火, 即成.

十) 趁熱, 馬上入樽. 樽蓋一定要用乾布抹至全乾才蓋上.

為免天慰太悶要抱抱, 所以帶埋架學行車去, 等佢自己可以四圍行. 果然一d都冇嘈我哋, 好乖!!!

Brigitte話, 其實大部分水果都可以用嚟做果jam, 包括從冰箱拎出嚟o既急凍水果. 糖o既份量, 唔可以少過水果o既份量, 即一公斤水果, 至少都要放一公斤糖. 而糖o既作用係令到果jam唔會因儲存太耐而變質. 如果糖放得太少, 會好易變壞.

測試做好o既果jam係咪夠"杰", 可以用隻匙羮"不"一滴落隻碗度, 將隻碗打斜, 如果滴果jam唔會向下流而馬上凝固, 就即係ok.