豆渣餅

2012年8月31日(星期五)

自從阿媽送左部豆漿機俾我之後, 而家每星期都最少打一次豆漿. 咁每次打完豆漿, 例必有一大堆豆渣剩低, 對於我呢個慳家嘅煮婦, 當然唔會將佢地倒落垃圾桶或廚餘桶啦!! 咁要點整, 班細路先會鐘意食呢??   起初試過用d渣嚟整麵包, 又試過用嚟蒸, 焗, 煎等等.... 不過都唔係好銷得, 有時仲會滯銷, 放到發霉添!! 除左係浪費d豆渣之餘, 仲side埋gaz, 仲有我嘅心機呀陰公....

因為中秋節快到, 响網上見到唔少教人整冰皮月餅嘅食譜, 我自己都試過整, 個皮煙煙靭靭, 好好味. 又試吓包d雪糕入去, 即刻變咗做雪米糍, 班細路同我哋兩老都好鐘意食, 不過, 食得多又怕肥. 咦.... 如果溝埋d豆渣落去, 唔知好唔好食呢?? 聽講豆渣好有益, 根據我家姐whatsapp資料話: "豆漿渣被視為當今保健食品的來源, 豆漿渣中有豐富食物纖維, 預防腸癌及減肥功效."   嘩, 正呀!!

行動至實際, 快d郁手就快d有得食. 我用咗200g黃豆打完豆漿之後嘅豆渣 + 55g 糯米粉 + 55g 粘米粉 + 30g 澄麵 + 230ml 牛奶 + 2湯匙煉奶 + 20ml 菜油 (冇放糖, 因為又係怕肥, 如果想食甜d就加多40g糖), 將所有材料撈勻放入鑊蒸15-20分鐘.

不過蒸完出嚟始終係一pet嘢, 就算幾好味, 班細路都唔會有興趣, 食兩啖, 敷衍你咪話好食囉, 跟住就會走咗去, 問佢哋仲要唔要呀?? 答案一定係: Non merci!!   所以今次我醒目喇, 用咗响香港買嘅月餅模, cup出嚟嘅餅型, 真係又靚又cutie. 今次仲唔引到你班嘢幫我清晒呢堆豆渣, hahaha.....

禮物 from mother

2012年8月2日(星期四)

最後一日响香港，正在執行李準備搭飛機返法國時，阿媽拎咗箱嘢俾我，佢話係幾個月前响裕華國貨度買.  到底係乜呢？？－－－原來係一部豆漿機呀！！嘩，多謝晒！！

 

 

記得之前同阿媽傾電話時，提起過想買部豆漿機，之後又冇咗回事，原來阿媽一直都記住，仲偷偷地買咗唔話過我知，等我臨走前至俾我一個驚喜.  估唔到我阿媽都識得玩呢一招！！認真鬼馬.  哈哈，多謝阿媽！！

返嚟法國四日，終於有時間試吓部豆漿機喇！說明書話只需十五分鐘就可以飲到香濃嘅豆漿，我就計吓時，睇吓係咪真係十五分鐘由生豆煮成豆漿，結果.... 係十七分鐘呀！！

依足說明書嘅份量，浸咗95g黃豆，再加1,3L水，煲出嚟嘅豆漿，果然係勁香濃呀！！嗰種香濃，真係好難用筆墨去形容.  同樣地, 我嘗試用100g黃豆, 加1L水(豆較多, 水較少), 以傳統嘅攪拌機磨豆, 煮出嚟嘅豆漿, 唔知點解, 始終冇阿媽買俾我部機煮出嚟嘅豆漿咁好飲, 真係唔係賣花讚花香架！！

不過, 都唔係話全無缺點, 佢既缺點就係 --- 太細部喇, 對我地呢d大家族嚟講, 真係唔夠喉. 每一次煲, 只得1,6L, 平均每人都唔夠230ml. 仲有就係有豆渣, 所以煲完之後, 都要隔渣先飲得, 唔隔都得, 冇咁好口感囉!! 但係, 我對呢部機既評價始終好高, 除左因為好飲之外, 仲有我阿媽個份心意嘛!!