天欣六歲生日

2012年11月29日(星期四)

我家三小姐天欣又大一歲喇!! 六歲, 六歲, 六歲.....

咁啱佢哋班都係今日下午搞生日會, 慶祝所有响十一月份出世嘅同學仔生日.  講到好似好多人咁, 其實除咗天欣之外, 仲有另一個同學仔啫, 佢個名叫做Rose, 不過佢係十四號架.

Rose個媽咪三個星期前同我講, 話佢會整一個蛋糕同帶幾盒嘢飲返去學校. 咁我呢?? 梗係都會整個蛋糕俾我個女攞返去啦, 因為佢哋班有24人呀, 真係要兩隻先夠分.

個蛋糕同d花花裝飾响前一晚我已經預備好......



所以今日淨係組件咋!! 開工之前, 先起個草稿......



可以開工, 因時間關係 --- 已經搞掂!!

 

放埋個蓋, 可以攞返學校喇!!

响返學途中, 遇見一班正在行樹林嘅耆英, 佢哋個個都話個蛋糕好靚喎, 仲祝天欣生日快樂添!! 有咁多人嘅祝福, 相信天欣今年一定有運行啫!!

送完班嘩鬼返學, 又即刻開工整蛋糕俾我哋自己今晚慶祝....

心目中係諗住整angry birds架, 因為佢哋近期好鐘意呢隻"鷄"(我班細路成日話佢係angry poule). 可惜整完出嚟覺得似貓頭鷹多d, 因為對眼太圓, 個咀太細.... 唉! 都怪自己冇摷多d相片做比較, 而且仲溝極都溝唔出紅色....

 

哈哈.... 大家食得開心就好啦!!!

 

 

 

 

天欣, 祝你生日快樂, 身體健康. From媽咪

 

又有嘢收

2012年11月18日(星期日)

今個月去探訪Brigitte, 佢又有禮送俾我喇!! 係三樽homemade車厘子果jam + 一盒榛子 + 一隻翠玉瓜, 隻瓜大到呢..... 重2公斤幾. 我哋食咗最少三餐呀!!

   

小手作 --- 聖誕卡

2012年11月7日(星期三)趁住仲係學校假期, 大家都咁得閒, 諗咗樣嘢出嚟俾佢地消磨吓d時間, 就係DIY聖誕卡喇!!

"好呀".... 四個嘅反應都好大. "咁會寄俾邊個架??"

我求其答: "或者寄俾公公啦, 婆婆啦, 爺爺.... 唔, 到時先算啦, 睇吓你地整成點樣樣先算啦...."

其實唔祈望佢地會整得靚, 只係想佢地有d嘢做吓, 創作吓, 最大嘅目的, 係想佢地唔好咁嘈啫....

搬晒d工具出嚟就開工喇喂 ---

 

 

好心有好報

2012年11月6日(星期二)

今朝起身拉開窗簾, 見到對面個鄰居Jean-Marc又有一大堆木送到. 如果冇記錯, 呢堆已經係佢今年訂嘅第四堆木, 唔知點解要訂咁多呢?? 唔通今年會好凍, 好凍同好鬼凍!?  

因為天禧發燒, 我唔得出去幫Jean-Marc手搬木, 所以派咗大嗰三個(天悅, 天樂, 天欣)去幫佢.

大約半個鐘頭, 佢地就返嚟喇!! 我問: "咁快返嚟嘅, 搬完啦?? 佢哋答: "係呀!"   唔係好相信, 去個窗度望吓, 見到Jean-Marc响度掃緊地..... 又真係喎, 證明"人多真係好辦事"架!!

天欣好開心咁話: "睇吓, Jean-Marc俾架!!" 原來係一大袋m&m's花生朱古力.... 嘩!! 今次有賺呀, haha....

不過其實唔係為咗回報嘅, 係想佢哋學識去幫助別人啫!!