Maman de 五小福: 10月 2012

2012年10月27日星期六

游泳年卡

2012年10月27日(星期六)

今日終於完成咗一個近呢兩年一直想做嘅心願, 就係申請咗一年期嘅游泳卡喇, YEAH!!

咁點解之前一路都唔整, 要等到今時今日呢?? 咪因為大肚囉!! 結婚十一年半, 每兩年生一個, 做咩鬼運動喎!?

而家生夠喇, 決定收工, 最細嗰個亦已經有歲半大, 識行識走, 係時候輪到我自己照顧返自己嘅身體喇!!

自覺肚腩越來越大, 好似長期有左五六個月咁, 真係要啲起心肝減減佢至得.

同老公商量好, 逢星期六朝早由佢看住班細路, 我就自己一個踩單車去游水.

咁點解又要申請年卡呢?? 因為單次入場費要4,20€太貴喇! 買五次入場卡要18,50€(平均每次3,70€ ); 買十次入場卡要32,50€ (平均每次3,25€); 而年卡就要102€, 最貴係佢!! 不過如果好次我咁, 諗住每星期最少去一次嘅話, 一年有52個星期, 即平均每次只係1,96€就變左係最平喇!! 不過當然, 一定要每星期去一次先至底, 否則.....

唔驚, 我呢dc9就最怕蝕底架喇, 唔去返夠本, 我誓不罷休呀!!

2012年10月20日星期六

味道週茶聚

2012年10月19日(星期五)

因為今個星期係味道週, 所以好多班級嘅老師, 都會邀請家長們同佢哋一齊食茶點, 不過當然亦會邀請返d家長帶一款甜品或咸品去分享.

今日下午三點半至四點半, 我同天禧就帶咗好多隻muffins去天樂班, 心諗呢段時間, 應該唔會有太多家長好似我咁得閒去參加啩

, 不過我錯喇..... 原來法國d家長真係好鬼得閒架, 睇吓~~ 差不多二十人出席, 占咗一半都係男人, 點解佢哋唔駛返工o既???

班學生好乖咁坐晒响地下, 等老師兩個兩個咁叫佢哋出嚟做"侍應", 即酙果汁同拎俾d家長飲.

每個家長都有嘢飲後, 老師就請我哋上前攞嘢食. 之後先輪到班學生

. 其中有兩款食物係老師自己整嘅, 就係蘋果pizza同蕃茄批, 聽落好似好怪, 但食落又ok喎!

天禧好受歡迎, 好多小朋友都爭住同佢玩

食飽飽後, 班學生表演朗誦咗兩首詩俾班家長聽, bravo!!

好在Noa(天樂最friend嗰個同學)個婆婆都有嚟, 佢係我個good friend嚟架, 咁我哋就可以有伴, 邊食邊傾, 好快就過咗一個鐘, 放學lu.....

2012年10月16日星期二

紅蘿蔔cake

2012l年10月16日(星期二)

今個星期, 係學校既 "la semaine du goût"(味道的一週), 即係話成個星期, d學生都會試食好多唔
同味道既食物, 老師亦會教學生做一d簡單又好味既菜式. 繼琴日, 天慰要帶兩隻翠玉瓜返學校外, 天樂同天欣都冇响屋企食早餐, 因為佢o地要返學校同老師同學一齊食.

今日, 輪到天悅要帶一個cake模同削皮刀返學, 因為佢o地班要負責整紅蘿蔔cake俾全校既師生食. 咁當然係佢個老師教佢o地點整啦~~

接佢o地放學時, 天悅一出嚟就即刻俾返個未洗既cake模同削皮刀我, 仲好開心咁話佢識得點整紅蘿蔔cake喇, 真係好好味咁話喎, 又話已經抄o左個recipe.....

係咁---"今晚你就整俾我o地試吓啦" 我話. "係呀, 好呀"天悅答.

做完功課之後就開工喇喂.....

材料:
1) 紅蘿蔔2條
2) 麵粉200g
3) 有鹽牛油150g
4) 雞蛋4隻
5) 糖100g
6) 酵母 15g

做法就真係極之簡單, 先將牛油丁溶, 紅蘿蔔削皮刨絲, 再將麵粉, 牛油,雞蛋, 糖同酵母撈勻後加入紅蘿蔔絲再撈勻, 倒入已搽油or牛油既cake模內, 再放入已預熱185ºC既焗爐焗45分鐘, ok!!