2011年5月30日(星期一)
到底 Facebook呢個網站, 係好定係唔好呢???
點解咁問??? 因為最近聽到一個好驚人o既消息, 其實都令我有d唔係咁開心 ----
一對以前响教會認識o既模範夫妻, 雖然已經一把年紀, 但平時總係糖黐豆咁, 相當恩愛, 仲有五個仔女添!!! 
記得佢哋請過當時仲係單身o既我食飯, 又教我點整mayonnaise, 同參觀佢哋自給自足o既農場. 真係好羨慕.... 
不過因為個太太响 Facebook到遇返前度男友, 佢瞞住個老公, 同前男友偷偷見面, 仲"返tak"咗添, 最後仲跟佢走埋.... 可憐個老公日日以淚洗面, 唔可以相信呢個事實, 可能鑽咗入牛角尖, 選擇以上吊嚟結束生命!!! 
希望呢d咁唔開心o既事, 唔好再有啦....
2011年5月29日(星期日)
又係一年一度o既母親節, 我家有五小福, 收到o既禮物就自然唔少啦!! 
天悅, 天樂同天欣, 响四月初o既教會兒童會活動中, 每人做咗兩份禮物,
準備母親節 + 父親節時, 送俾我同老公....
呢個幾月嚟, 
佢哋都保持神秘唔肯講整咗乜, 話到時候我哋就會知道喎!!!
今日終於收到喇!! 好靚呀....
藍色記事黑板係天欣送; 綠色書籤係天樂送; 黃色煲墊係天悅送. ↓
天慰o既托兒班都有份小小禮物送俾d媽咪, 好有心思, ↓
多謝晒!!! 
其實禮物對我嚟講並唔重要, 只要你哋乖, 聽話就夠晒 lu....
鍚晒你哋呀!!! 
雖然天禧未識做手作仔, 不過都好鍚你呀!!!
2011年5月16日(星期一)
天悅今年學校宿營係去 la Rochelle, 由16~20號, 共五日四夜, 200€.
係佢第一次離開屋企咁長時間, 佢成日話: "我好想去, 但係又唔係好想去." 唔想去o既原因係唔捨得我哋喎!! 都唔知邊句真.... 
老師們為免有學生臨急先至執行李, 所以千叮萬囑要响13號執好, 仲要交一張 list, 詳細寫明帶咗d乜. 我哋當然好聽話咁跟足老師o既吩咐啦!!!
終於到咗16號, 我六點就起身幫天悅準備午餐同goûter. 七點三準時帶佢返到學校集合, 點名, 上車.... 諗住等到佢哋開車就返屋企. 後來聽到一個老師同另一個老師講, 話有個學生以為係20號先走, 所以仲未執行李, 問好唔好等埋佢.... 吓??? 咁烏龍都得??? 好在個老師好人, 肯等佢最多20分鐘, 但夠鐘仲未見人就會即走.
我梗係唔會等埋佢啦, 真係即走喇!!! 雖然只係幾日唔見, 但又真係有d唔拾得... 
活動行程表 ↓
Have a nice trip!!!
