起樓

2011年9月25日(星期日)

天悅姐姐好唔小心呀!!! 佢將天禧放入架學行車時, 將佢整跌咗落地下呀!!!

因為天禧d腳仔都未插入o個兩個窿度時, 天悅已經放手, "砰"一聲, 之後"哇"....

好快咁, 天禧個頭仔就起咗座樓. 咁細個就學人搞地產, 可惜係冇錢賺嗰種.

叫老公快d恰隻雞蛋俾我幫天禧碌頭, 果然好有效, 碌完之後座樓即時矮咗. 不過可能碌得太大力, 居然擦到個頭仔損咗.

放隻雞蛋入廚房, 諗住一陣先掉落垃圾筒. 點知轉個頭, 就見到天慰响廚房行出嚟, 個口漲卜卜咁趙趙吓. 問佢食咩啦, 佢話: "食蛋蛋囉".... 真係唔知好嬲定好笑.

五個月

2011年9月14日(星期三)

天禧五個月大.

响四至五個月大期間, 我注意到以吓呢兩件事:

第一) 佢認人好叻, 呢個"人"就係我喇!! 成日只係想要我抱. 其他人(包括爸爸同婆婆)都搞佢唔掂, 唔好話抱佢, 連望吓都唔得, 只要佢一認出望住佢o個個人唔係我, 佢就會即刻大喊. 所以有時我覺得好攰, 因為冇乜人湊得掂佢.

第二) 佢d腳仔好有力, 只要握住佢兩隻手, 佢就會用腰力屹起身, 然後兩隻腳就好大力咁成個人撐起, 之後仲向前行添. 婆婆話佢應該好早識行喎, 希望佢識行之後, 會冇咁黐身啦!!!