意外

2014年1月7日(星期二)

食完午餐又夠鐘返學, 叫佢哋快啲準備…

天慰不斷指住個下巴同我講話好痛, 望落去又見唔到有咩嘢, 所以冇理佢.

去接放學時, 先至發現原來係咁嚴重架!

佢話係落樓梯時俾個扶手擦到, 千叮萬囑佢唔好去摸, 遲啲結焦時, 千祈唔好去mit, 如果唔係, 第時有la就唔靚女架喇!

唉! 希望佢聽話啦!!

Samoussas

2014年1月6日(星期一)


並唔係佢嘅生日, 亦唔係咩節日, 只係想氹下佢開心啫! 佢係 --- 我老公。

佢响La Reunion(留尼旺)長大, 嚟咗法國超過廿年, 期間並冇返過去.

可能係思鄉病, 所以時不時就會提起以前响“鄉下”時嘅嘢, 特別係嗰度嘅食物, 其中一樣最掛住嘅, 就係Samoussas(一種印度食品), 類似香港嘅咖哩角, 三角形嗰種呢!

以前我都曾經整過港式咖啡角俾佢食, 但佢話啲味唔係好似喎! 自始就冇再整過喇!

上個月, 佢响公司附近發現咗間專賣佢鄉下同亞洲食品嘅雜貨店, 即刻打電話返嚟同我“報喜”. 仲專登响平安夜嘅下晝帶我去睇添! 其實佢嗰日放假架… 可想而知佢有幾咁思鄉呢!

入到間鋪頭, 不斷叫我睇呢樣睇嗰樣, 因為好多貨品都係佢鄉下嘅特產, 好多牌子o我真係第一次見呢! 去到收銀處附近, 有個櫃賣小食, 其中當然有Samoussas啦! 另外仲有一樣叫Bonbon au piment (我第一次聽), 兩種都係佢想食嘅. 見佢望咗成分鐘陰陰嘴咁笑, 之後轉身就話: 俾錢走喇 (我哋有買其他嘢)! 我有啲驚訝咁問“唔買咩?”佢話唔值咁貴喎! 所以唔想嘥呢啲錢.

我就認為咁難得見到自己鐘意嘅嘢, 又山長水遠嚟到, 再貴啲都冇所謂啦! 千金難買心頭好嘛! 不過佢都好堅持咁話唔買... 咁算啦! 不過我好肯定, 如果係我想食嘅話, 佢幾貴都會買俾我. XD

琴晚, 上youtube睇咗成晚教整Samoussas嘅片, 原來冇一種真正/傳統嘅食譜架, 因為裏面可以包吞拿魚, 牛肉, 豬肉, 雞肉, 火雞肉等等, 甚至係冇肉添… 最後, 我揀咗包牛肉, 除咗某些香料我哋厨房冇之外, 大部分材料都齊全.

今晚, 開工喇!! 用咗約一個鐘頭... 搞掂!!

因為一邊炸一邊準備其他嘢食, 所以燶咗啲 @@

唔係認叻, 真係好好味呀! 總共包咗15隻, 即平均每人可以分到兩隻, 老公有三隻, 不過我決定只食一隻, 俾多隻老公食, 以慰佢思鄉之苦. 哈哈…

下次挑戰Bonbon au piment!!

終於開齋

2014年1月4日(星期六)


今日, 終於決定的起心肝, 認認真真咁坐响枱前, 去寫我响blogspot嘅第一篇文章。

自從9月2日, yahoo blog宣佈將會執笠之後, 一直心大心細, 仲繼唔繼續寫blog好呢?

如果唔寫, 真係覺得好可惜! 寫, 响邊度寫好呢? 咁之前嘅blog要唔要搬過去呢? 唔搬? 又唔甘心, 搬? 咁大工程, 以我呢個電腦白痴又豈能應付呢? 就係咁, 諗嚟諗去.... 橫掂12月26日至正式摺埋, 遲啲先算啦!

一眨眼, 聖誕節就嚟到, 係時候要正視呢個問題喇!

有朋友話我知, 可以好輕鬆咁搬過去weshare.hk, 果然, 真係一click, 好快就搬好, 好嘢!

不過其實, 我自己好想搬去blogspot架, 因為大部分blog友都响呢度, 大家要吹水都方便啲嘛!

用咗整整一晚嘅時間去研究人哋分享搬blog嘅文章, 第二晚自己跟住做, 成功將文字搬咗過嚟, 可惜冇相, 有啲失望… 第三晚, 再研究再搬, 一樣得字冇相, 極之失望… 又用多一晚時間去研究點解搬唔到相過嚟, 結果發現係上載相片上google drive時出錯, 重新upload相後再去blogspot匯入. 終於, 皇天不負有心人呀! 得咗!

所以响度, 衷心感謝分享過搬blog心得嘅朋友, 冇你哋嘅無私分享, 恐怕我都無法將之前嘅blog搬嚟呢度lu.

雖然, 我嘅blog唔似人哋嘅咁吸引, 寫咗幾年都冇上過yahoo精選, 但裏面所記低嘅鎖碎事, 正係我認為重要嘅回憶, 尤其係小朋友嘅成長過程. 所以希望自己會繼續努力, 就將“寫好個blog”作為2014年其中一個目標啦!!

响呢度, 送上遲來的祝福… 願大家都可以達成自己嘅目標!!

買到平嘢！

2013年12月19日(星期四)

最近上網睇咗好多款藍牙耳機, 因為想買多隻平時粗粗地用.

前兩日收到amazon e-mail, 咁啱佢哋嘅藍牙耳機做緊promo.

見到Philips有款由70€99減到49€99, 呢款我之前都有研究過,
真係買咁貴架!

而家減咗咁多, 唔買真係會後悔, 即刻落單…

兩日後, 叮咚 ~~~

好嘢! 好開心可以足不出戶就買到平嘢, la vie est belle, non? ^^

小禮物



2013年12月17日(星期二)

上埋今次長笛堂就開始放聖誕新年假lu, 我都冇諗起要送嘢俾老師，反而老師卻有禮物送俾我....

原來係聖誕老人朱古力同迷你匙扣

 朱古力送咗俾班細路食, 吊墜就掛响長笛袋嘅拉鍊, 好靚呀!

多謝!!

收菜

2013年6月14日(星期五)

我的菜菜越來越大喇, 係時候摘大塊既葉嚟食lu....



呢D咁重要既任務就梗係由班細既負責啦!!

  

就係摘左咁多喇....

  

望落好似好多, 可惜炒完就唔見食, 不過味道真係ichiban呀!!

 

荷蘭豆

2013年6月18日(星期二)

今年係我第二次學人種荷蘭豆, 不過係第一次成功種到出豆....

 

第一次係兩三年前喇, 直接種入泥, 不過冇嘢出. 

今年就先响盆度發芽再移苗, 因為荷蘭豆係"欄"籐,

法國四五月都仲係好凍, 唔可以咁早種入田,

所以種响個膠箱, 插竹仔俾佢哋欄.

又由於係咁, 唔可以再移返入田....

其實我都知道係唔夠泥俾佢哋生長, 不過真係冇偈.

可以種到有收成, 已經好心滿意足, 就當係攞個經驗囉!!

今日摘左六條, 算係好嘅開始呀!!(氹吓自己開心)