2010年5月31日(星期一)
唔經唔覺, 天慰已經出咗五隻牙仔, 上面三隻 + 下面兩隻.
自從有牙之後, 佢就唔肯再食自己d糊仔, 要同我哋食一樣o既嘢, 而且食量都幾大. 
十五個半月, 終於肯行喇!!!! 仲識得上落樓梯, 梳化同床等....
講好多嘢!!! Ex: 好多疊字, 如爸爸, 媽媽, 姐姐, 哥哥, 婆婆..... 複雜些少o既有: allô, au revoir, merci, tiens, donne, 沖涼涼, 換片片, 去街街.... 仲識得扮貓叫. 另外仲有好多我哋聽唔明o既句子.
一見我講電話, 就會話 --- "allô 婆婆"
不過佢至叻o既, 係一聽到我哋話要祈禱或fait la prière, 就會即刻話 ---
"Amen" 
2010年5月30日(星期日)
好耐冇寫blog喇!!!! 又係時候睇吓我d植物o既進展...... 
由於天氣時凍時熱, 生長速度唔算快, 尤其係矮瓜同牽牛花, 個半月都只係得手指咁上下大, 都唔期望會有收成呢!!! 
大得最快o既, 係黃牙白同丁香.
至於蕃茄?? 冇晒 lu..... 
一夜之間, 俾d乞人憎o既嘢食晒.... 都唔知係蝸牛定鼻涕蟲o既所為??? 冇詭啦, 再種過就太遲, 趕唔切响九月前收成. 唯有o係Auchan買咗棵苗仔, 希望可以開花結果啦!!! 
另外再用核種咗三棵牛心蕃茄.
先嚟睇吓塊田仔o既近況先 
左起有三棵courgettes, 跟住係蕃茄同兩棵黃牙白, 再嚟兩行紅蘿蔔, 仲有兩棵西蘭花同另一棵黃牙白, 再隔離就係嗰兩棵唔識大o既矮瓜, 最後係兩棵魚翅瓜
嚟個close up...... 
三棵courgettes, 另外仲有兩棵喺盆, 遲d先種落田
Auchan買o既蕃茄苗大咗好多
兩棵黃牙白
兩行紅蘿蔔
兩棵西蘭花(同期種, 但一棵細一棵大)
第三棵黃牙白
兩棵唔識大o既矮瓜
魚翅瓜兩棵
以上係田中物, 以下就係盆中物:
包括有大得勁慢o既牽牛花兩棵
大得好快o既丁香八棵
用核種o既牛心蕃茄三棵
芫茜四棵
蔥
Framboisiers
報告完畢
2010年5月8日(星期六)
上年十月响ebay用三十幾歐元投咗個一千公升o既雨水收集桶 (原價要成佰四歐元), 放咗响屋外超過半年.
所謂雨水收集, 即係利用屋頂收集雨水, 再經水管流入桶內.
近來天氣開始回暖, 老公開始砍樹, 排板, 駁水管, 放水桶埋位, 固定等.... 整個工程大約用咗三個星期, 因為每日都係放工返嚟先開始, 做兩三個鐘就天黑要休息, 所以進度咁慢囉!!! 不過, 上星期六終於都裝好喇!!!! 
自從個桶用得之後, 成個星期都唔好天, 落咗好多雨呀!!! Yeah.... 
呢個桶真係大派用場, 到今日為止, 已經接咗有九百幾公升雨水. 就快滿瀉喇!!!
雖然雨水唔係好乾淨, 不過就勝在冇水垢, 用嚟淋花, 抺地, 洗車, 洗其他嘢等.... 就真係very good!!! 而且仲唔駛就住就住咁用添....
自從裝好個桶後, 每次落大雨, 我哋都好鐘意坐响廚房門邊, 睇住d雨水跌落個桶度, 感覺好似入錢落豬仔錢罌咁, 正!!! 
呢個就係雨水收集桶喇, 容量一千公升
雨水從屋頂收集, 經呢條水管, 直接流入個桶
由於屋頂有些少青苔, 佢哋會隨住雨水流入個桶, 所以一定要响個入口上面放個隔. 除咗防青苔外, 仲可以防蚊入去產卵.
一個星期後, 已經收集咗九百幾升雨水
有排用呀!!!
