天悅天樂返香港 2011

2011年6月16日(星期四)

機票買咗幾個月, 今日終於出發喇.... 爸媽會帶天悅天樂返香港同珠海過暑假. 8月22號, 阿媽會帶返兩隻馬騮返嚟, 住多一個月先再返香港!!!

*********************************************************************************

接完班細路放學, 食過 goûter, 五點十分開始去機場, 正常應該六點三前到. 點知遇著有人撞車, 塞咗一個鐘.... 結果七點四先趕到. 心急C我哋. 好在仲趕得切check-in, 因為班機本來係2020飛, 宜家delay咗四個鐘. 所以航空公司送咗六張Hippopotamus免費餐卷俾我哋食晚餐. 話明係免費, 就梗係冇得點菜, 而且味道仲真係麻麻哋添, 不過都好過冇啦!!!

 

無端端多咗兩個幾鐘最後相處o既時間, 真係覺得好似賺咗咁, 但所謂送君千里, 終需一別....  又所謂快樂o既時光過得特別快, 又係時候講 byebye.... 

再唔捨得, 都係要入閘. 不過可能因為我知道兩個幾月後, 阿媽又會再返嚟, 所以唔算真係好難過. 只係流咗幾滴眼淚, 有進步!!! 天悅都有d唔捨得, 不過我好肯定, 佢哋之後一定唔係好想返返法國.

Anyway, bonnes vacances喇!!!

 

 

天樂六歲生日

2011年6月16日(星期四)

我哋又有小朋友生日喇.... 今日o既壽星仔係 --- 天樂.

生日快樂, yeah!!!

 

今次冇幫佢搞生日會, 而且仲要係食完中午飯後吹蠟燭切蛋糕.

點解?? 皆因佢下午放學返嚟, 就要起程去機場返香港 lu....

佢同天悅兩個, 返埋今日學就開始放暑假喇, 俾人哋早咗兩個星期呀!!

好似天悅一樣, 天樂份生日禮物就係張飛機票喇!!!

兩個月

2011年6月14日(星期二)

又過咗一個月喇, 天禧今日有兩個月大.

而家重4,5kg, 高54cm, 頭圍36cm

由個半月開始, 我哋同佢講嘢時, 佢識得"依依哦哦"咁回應,

又成日笑, 尤其係朝早訓醒覺就笑得特別燦爛.

之前塊面有d粒粒, 依家唔見晒, 仲滑嘟嘟添.

啱啱出世時, 兩條腿好似青蛙腿咁幼, 而家就好粗吓喇 !!

之前沖親涼都會大喊, 喊到拆天嗰隻, 而家就變到好enjoy.

兩個面珠登仔都一樣, 漲卜卜咁, 真係成日都好想鍚鍚佢.

鐘意妹妹

2011年6月12日(星期日)

 天樂好鐘意天禧妹妹, 成日去鍚佢個面珠登仔, 又成日想抱佢.

今日响教會佢同我講 :"我好鐘意bb仔, 我想第時同佢結婚呀!!!" 

哈, 真係俾佢笑 C....

不過, 以前佢都成日話好鐘意天慰妹妹啦 (當天慰仲係bb仔時),

而家天慰識得同佢爭嘢玩, 所以唔再鐘意 lu....

 

遊賽納河

2011年6月11日(星期六)

老豆同阿媽嚟咗咁耐, 除咗同佢哋去過樹林, 逛花店(Truffaut et Jardilande), 超級市場買日常食用品外,  都冇去邊度參觀過.

話咁快, 仲有唔夠一個星期, 佢哋就會返香港喇... 

臨走前最後呢個星期六, 我哋一行十二人 (我哋一家七口+爸媽+Philippe+Windy+牛頭仔), 出咗去巴黎坐船遊賽納河....

今次我哋係搭 Les Vedettes du Pont-Neuf, 船程一個鐘頭. 現場買成人價13歐元, 四歲以上小童6歐元.

不過因為Philippe公司買呢隻船飛有優惠, 不論大人定細路一律3.5歐元/張.

 嘩!!! 真係平咗好多呀!! 以後有朋友嚟玩, 可以搭佢幫我買平飛.

好緊張呀, 準備落船喇, yeah!!! ↓

 

次次影相都冇我份  ↓

天禧全程都係冇眼睇....  ↓

 

臨走前攞咗本導遊手冊, 入面有齊兩旁風景o既中文介紹, 真係要刨熟佢先得, 事關有好多建築物都唔知係乜....

今日都玩得幾開心