2011收成篇 --- 第二隻角瓜

2011年7月22日(星期五)

今日又收咗隻角瓜, 比上次嗰隻又重咗d.

三個月

2011年7月14日(星期四)

真係唔覺唔覺, 天禧出咗世已經三個月喇!!!

比起兩個月大到而家三個月大, 都有唔少o既改變.

 

 

 

例如 --- 

尿片由二號轉咗用三號.

條頸有力咗好多, 左右兩邊望時轉得快咗.

兩隻手仔開始有意識咁想攞响佢前面o既嘢.

雙眼望得遠咗, 有時離遠見到我, 都會笑笑口.

兩個腳仔成日撐吓撐吓, 踩到人哋大脾就想企.

有時就算冇人同佢講嘢, 佢都會依依哦哦咁想學講.

好似知道自己叫咩名咁, 一叫佢就望過嚟, 但如果叫其他人名, 佢就冇乜反應.

而家重5,4kg, 高56cm, 頭圍36.5cm

 

國慶煙花2011

2011年7月13日(星期三)

自從2008年開始, 响7月13號晚11點去睇國慶煙花, 已經成為我哋o既年度活動.

當然, 比起香港所放o既煙花, 可以話係小毛見大毛.

不過..... 鬼叫我哋响法國咩!!!!

我哋大人就話識得分別大小毛啫, 班細路又點會識丫....

佢哋對呢個年度活動好期待, 每次去睇都會好興奮.

今年有d特別, 就係少咗天悅同天樂, 但又多咗個天禧.

我部相機買咗兩年, 今次係第一次用影煙花模式嚟影煙花, 效果係..."差"!!!

2011收成篇 --- 第一隻角瓜

2011年7月10日(星期日)

今日我哋有客人呀!!! 係Irène一家四口, 同Philippe一家三口.

晚餐當然又係bbq啦....

有肉冇菜, 點都好似唔係好健康咁.

所以摘咗今年第一隻角瓜去烤, 好好味呀!!!

甲賀派忍者貓??

2011年7月9日(星期六)

今晚陪老公淋花時, 見到對面鄰居隻貓Cadeau, 踎咗响人哋個屋頂上面.

莫非佢就係傳說中o既"忍者貓"???

不過過咗一陣, 見佢又爬上又爬落, 好似係响度諗緊點樣落返嚟咁....

我有諗過,  好唔好幫佢call消防員嚟呢?? 好在十幾分鐘之後, 見佢唔到 lu.... 

而家我好肯定, 佢個主人唔係"金墨基"囉!!!

 

開心大發現

2010年7月1日(星期五)

今年所有種o既農作物, 都係爸媽幫我種o既.

由於唔係我一手一腳去服侍, 所以冇好留意佢哋o既生長....

自從爸媽走咗之後, 照顧d農作物o既責任, 又落返响我自己身上喇!!

 

今晚淋水時, 嘩!!! 發現一隻好大o既角瓜呀, 响另一棵原來仲有一隻細細地, 睇嚟好快有得食喇喂.... 

留心睇真d, 連蕃茄都已經出咗好多隻....

稞南瓜都有好多花冧, 同爬到好遠, 不過就未有果.