Maman de 五小福: 1月 2013

2013年1月21日星期一

落雪週

2013年1月21日(星期一)

自從星期一晚開始落雪到而家, 足足一個星期.

周圍都舖滿厚厚既白雪, 風景好靚, 好靚....

本來今朝應該要返教會, 都因為太大雪而取消咗, 好難得有一個星期日既早上可以大覺瞓, 當然唔會錯過呢個大好機會啦!!

睜開眼, 已經差不多中午十二點. 食過午飯, 班細路不停問得唔得出去砌雪人呀?? 得!! 不過我唔出去架, 你哋要出就著多d衫. YEAH!!!

小朋友真係唔識凍架, 佢哋一出就兩個鐘, 唔叫都唔打算返入屋呀!!

不過, 夠喇!! 希望唔好再繼續, 因為真係好唔方便, 尤其係要出車時, 要花好多時間去刮冰, 而且又危險. 仲有, 去學校接送班細路時, 天禧架bb車好難推呀...!!

2013年1月15日星期二

六十歲大壽

2013年1月13日(星期日)

今朝响教會, Helene靜雞雞同我哋講, 話今日係佢老公(即係我哋個主教)嘅六十歲生日, 將會有個神秘生日會, 希望我哋散咗會之後, 去兒童會室集合一齊唱生日歌.

大家都好安靜咁响度等...

Stephen去叫主教入嚟, 一見到佢, 唱.....

咁多人, 蛋糕當然都要好大啦!! 呢個係巨型galette des rois, 一半係fromboise味, 一半係傳統嘅牛油杏仁味, 不過兩種都一樣咁好味.

人多關係, 切都用咗唔少時間, 每人切一半, 成班細路圍住响度等食.

搶呀!!

好快, 搶清光lu.... 睇吓天慰嘴lamlam個樣, 就知道好好味啦!!

事後問Helene個galette係咪自己整, 佢話係响相熟嘅boulanger訂造架, 友情價3€一份, 而成個galette計30份 = 90€. 佢哋仲另外訂多一個for今晚自己人慶祝, Helene送俾佢老公嘅生日禮物係一部Samsung note 10"1. 嘩!!! 真係廿四孝老婆.

仲唔輪到你！?

2013年1月14日(星期一)

話說琴日老公發現天樂d牙好奇怪，原來係下排有隻恆齒响後面出緊出嚟!!

由於天樂冇mok牙嘅經驗，又冇天悅姐姐咁勇敢. 我哋諗住俾多一日時間佢，如果聽日都mok唔甩隻牙，我就會打電話搵牙醫幫手.

結果, 瞓覺前擦牙時, 隻牙就自己跌咗落嚟.

天欣好興奮咁沖落嚟同我哋"報喜", 好似佢自己係主角一樣....

Yeah.... 大個仔喇!!

好事成雙??

2012年1月13日(星期日)

食晚飯時, 老公發現天樂d牙齒好奇怪, 睇真d, 原來下排有隻恆齒响後面生緊出嚟.

問佢前面嗰隻牙郁唔郁架?? 些少啦!!

咁要快d mok咗佢喇, 如果唔係後面嗰隻牙唔會生返埋位架!! 哦!!

之後佢就成日去搖隻牙, 不過係好輕手嗰隻.

大家姐天悅係mok牙高手, 好積極咁教細佬點樣用力..... 大力d大力d!!!

仲好落力咁搖自己d牙做示範添.

搖搖吓, 連本來只係鬆鬆哋嗰隻牙都搖到甩咗, 呢隻已經係佢自己mok嘅第十隻牙喇!!

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

之後, 佢又發現下排有隻牙鬆鬆哋.

如果可以就mok埋佢囉!! 哦, 試吓啦!!

跟住, 佢又再示範俾天樂睇點樣mok.

大約五分鐘之後..... 搞掂!!