八個月

2011年12月14日(星期三)

唔知點解, 天禧隻左眼, 由單眼皮變咗做雙眼皮, 真有趣!!!

 

天欣五歲生日

2011年11月29日(星期二)

好似啱啱寫完天欣張新床仔冇幾耐, 原來又已經一年喇.....

中午整咗個大蛋糕俾天欣, 等佢可以攞返學校同班老師+同學仔慶祝五歲生日. 下晝拎住個蛋糕返學時, 個個都問係邊個生日, 天欣好自豪咁答: "C'est moi !!"

因為好趕, 冇時間幫個蛋糕影相, 不過天欣個老師影咗幾張, 貼咗响本cahier de vie. 雖然學校部printer既qualité同顏色唔係咁靚, 不過都好過冇.

接天欣放學時, 佢好開心咁話: "個蛋糕好好食呀!!! Tout le monde都話好好味."

                         

夜晚, 又係自家人慶祝, 今次個蛋糕係老公買o既黑森林蛋糕, 味道ok啦, 志在一家人開開心心, 唱吓歌仔, 吹吓蠟燭啫!!

 

 

天欣生日快樂!!

七個月

2011月11月14日(星期一)

天禧識講媽媽喇, 叻叻!!!

萬聖節 2011

2011年10月31日(星期一)

又係一年一度o既萬聖節 , yeah!!! 嘩鬼又出籠喇!!!

上年冇去拍門攞糖, 起初以為係因為我哋去咗德國, 仲懶叻咁問天悅: "妳記唔記得點解上年我哋冇去拍門丫??" 佢話: "記得, 因為上年係星期日嘛, 去完教會之後訓咗覺囉...."   咦!!! 計吓計吓, 又好似係喎, 我哋又真係星期六已經返返屋企.... 所以話啫, 細路仔d記性始終都係好過大人, 呃唔到佢哋架!!

一早, 班細路就煩住我, 問幾時開始換衫, 可唔可以化粧喎, 又問邊個扮南瓜, 邊個扮巫婆, 邊個扮公主..... 唉, 邊個啱著d衫咪邊個扮乜囉!!! 結果.....

我哋兩點半出發, 四隻嘢開始不停去拍門

 

 

 

繼續努力中.....

 



袋袋平安

 
 
始終呢個都係美國o既節日, 响法國, 稍為有d氣紛o既地方, 相信都係响商店啦! 普通住家, 只係得幾間屋外有d佈置, 而有佈置o既屋, 又唔見得間間都會開門. 而且亦有唔少人根本唔知係Halloween添, 尤其是老人家, 佢哋會表示歉意, 因為見到班細路咁得意, 自己又冇預備到糖. 

不過點都好啦, 呢d就係我哋今日o既收穫喇!!! 總重1,664克. Yeah....

 

 

六個月

2011年10月14日(星期五)

 
六個月大o既天禧, 最大o既進步, 相信都係開始學坐喇!!! 好嘢, 希望好快就會冇咁黐身, good!! 真係諗起都興奮呀!!

自從响center parc返嚟嗰晚開始, 我決定唔再陪公主訓覺. 到時到候, 就放佢入自己張床仔, 講完bonne nuit, fait完bisous就刪門走人.... 當然, 會聽到一輪嚎哭, 都要好一段時間先會安靜. 不過濠哭時間好似一晚比一晚短. Bien....   所以我而家夜晚多咗d時間用, 輕鬆咗好多. 可惜佢仲未可以一晚訓到天光, 每晚好準時响三點幾就會喊, 真係同鬧鐘冇乜分別.
  

BB有便便呀

2011年10月2日(星期日)

近排覺得天禧好似瘦左d, 可能淨係飲奶唔夠飽, 又好快肚仔餓. 所以呢個星期初, 開始煮糊仔俾佢食. 由於係半固體食物, 食左幾日, 都冇便便痾.

其實都知道佢好辛苦, 因為有時聽到佢個肚仔"咕咕"聲, 有時又一路大喊一路將個身扭來扭去.... 五日喇, 五日都冇便便呀!!!

今日食完晏, 要同佢換片片, 包新片前, 順便响痰罐竇吓, 睇吓有冇o野痾啦.... 見佢好用力咁推呀推, 就知道嚟料喇.....  不過佢痾得好辛苦, 仲喊得好大聲添. 好唔容易先至完事. 見到佢個樣, 就令我諗起生仔時o既辛苦. 唉!!!

 

起樓

2011年9月25日(星期日)

天悅姐姐好唔小心呀!!! 佢將天禧放入架學行車時, 將佢整跌咗落地下呀!!!

因為天禧d腳仔都未插入o個兩個窿度時, 天悅已經放手, "砰"一聲, 之後"哇"....

好快咁, 天禧個頭仔就起咗座樓. 咁細個就學人搞地產, 可惜係冇錢賺嗰種.

叫老公快d恰隻雞蛋俾我幫天禧碌頭, 果然好有效, 碌完之後座樓即時矮咗. 不過可能碌得太大力, 居然擦到個頭仔損咗.

放隻雞蛋入廚房, 諗住一陣先掉落垃圾筒. 點知轉個頭, 就見到天慰响廚房行出嚟, 個口漲卜卜咁趙趙吓. 問佢食咩啦, 佢話: "食蛋蛋囉".... 真係唔知好嬲定好笑.