2011年12月14日(星期三)
唔知點解, 天禧隻左眼, 由單眼皮變咗做雙眼皮, 真有趣!!!
香港人話養大一個小朋友要四百萬,嘩嘩嘩… 我家有五個小朋友,豈不是要有二千萬至可以養大佢哋?@@ 非也,我哋肯定冇二千萬,亦唔係咩有錢人家,只係過住平淡嘅生活,但仍過得好開心。^^
夜晚, 又係自家人慶祝, 今次個蛋糕係老公買o既黑森林蛋糕, 味道ok啦, 志在一家人開開心心, 唱吓歌仔, 吹吓蠟燭啫!!
天欣生日快樂!!
2011年10月2日(星期日)
近排覺得天禧好似瘦左d, 可能淨係飲奶唔夠飽, 又好快肚仔餓. 所以呢個星期初, 開始煮糊仔俾佢食. 由於係半固體食物, 食左幾日, 都冇便便痾.
其實都知道佢好辛苦, 因為有時聽到佢個肚仔"咕咕"聲, 有時又一路大喊一路將個身扭來扭去.... 五日喇, 五日都冇便便呀!!!
今日食完晏, 要同佢換片片, 包新片前, 順便响痰罐竇吓, 睇吓有冇o野痾啦.... 見佢好用力咁推呀推, 就知道嚟料喇..... 不過佢痾得好辛苦, 仲喊得好大聲添. 好唔容易先至完事. 見到佢個樣, 就令我諗起生仔時o既辛苦. 唉!!!
2011年9月25日(星期日)
天悅姐姐好唔小心呀!!! 佢將天禧放入架學行車時, 將佢整跌咗落地下呀!!!
因為天禧d腳仔都未插入o個兩個窿度時, 天悅已經放手, "砰"一聲, 之後"哇"....
好快咁, 天禧個頭仔就起咗座樓. 咁細個就學人搞地產, 可惜係冇錢賺嗰種.
叫老公快d恰隻雞蛋俾我幫天禧碌頭, 果然好有效, 碌完之後座樓即時矮咗. 不過可能碌得太大力, 居然擦到個頭仔損咗.
放隻雞蛋入廚房, 諗住一陣先掉落垃圾筒. 點知轉個頭, 就見到天慰响廚房行出嚟, 個口漲卜卜咁趙趙吓. 問佢食咩啦, 佢話: "食蛋蛋囉".... 真係唔知好嬲定好笑.