Maman de 五小福: 3月 2011

2011年3月27日星期日

做監票人

2011年3月27日(星期日)

繼上個星期日o既第一輪投票, 响六個候選人中, 選出咗其中兩個(Frank VERNIN 同 Jean-Pierre GUERIN), 今日係第二輪o既投票, 要二選一.

我同老公返完教會, 就去投票站盡公民o既責任. 登記時, 在場一位工作人員問我哋今晚六點鐘可唔可以嚟做點票o既監票人?? 嘩.... 好難得o既機會呀!!! 真係覺得好榮幸!!! 橫掂有老豆同阿媽响屋企看住d細路, 梗係要嚟見識吓啦!!!

準時六點, 我哋返到投票站, 佢哋已經開始緊點算今日總共有幾多人响呢個投票站投過票. 每個人投完票後一定要簽名, 所以係响本簿內o既每一頁點吓有幾多個簽名. 第一次佢哋計咗有367人, 但係第二次就只有365人, 所以要計第三次.... 結果真係有367人.

點完人數後, 就要點清楚係咪真係有367張選票. 佢哋每十個信封為一叠, 每一叠都要由一個人再覆檢. 其中有一叠真係放咗11個信封, 好在發現得快, 唔係又有排搵.....

點完選票啱數後, 就係要拆開嚟計吓各人得到幾多票喇!!!! 而我, 就係負責用筆記低, 每拆開宣佈一張, 我就响嗰個候選人度劃一下, 而候選人每得到十張票, 就要講dix通知佢哋, 佢哋再點清楚係咪夠十張票同十個信封, 然後又將嗰十張票為一叠, 十個信封又為一叠咁放. 都幾複雜吓, 不過就確保冇出錯, 同容易搵出錯處.

响拆開宣佈得票時, 都有大約十張廢票 --- 有d人只係放個空信封, 冇投到任何候選人; 又有d人一次過放兩張唔同候選人o既名入同一個信封; 有個人仲離譜, 放咗一張候選人名入信封, 但係就用筆劃咗個大交叉, 响背後寫住唔會投俾呢個黨..... 何必呢!!!!! 又有一個人, 將兩張同一個候選人名入响同一個信封, 唔知係咪一對環保夫妻一齊去投票, 諗住慳返個信封而放埋一齊呢???? 不過可惜原來只係當一張票計算囉!!!!

整個過程, 用咗個半鐘頭, 我哋七點半就離開. 响呢個投票站, 係由 Jean-Pierre GUERIN得票較多. 不過有咁多區同投票站, 佢又未必真係嬴家囉!!!!

結論: 都幾好玩吖.... 可惜冇錢收.

房仔工程 --- 大功告成

2011年3月26日(星期六)

終於大功告成喇!!!

本來諗住做三至四日o既工程, 終於用咗兩個幾月.... 原因係老公响呢段期間又病, 又咳, 開生蠔時又俾刀仔插親手.... 唉, 總之就係多災多難啦!!!

呢個房仔o既 isolation做得好差, 而且上手屋主仲响側邊開咗個門仔, 原意係做個細儲物室, 不過個門又太細, 入面又污污糟糟, 乜都放唔倒入去, 就算放倒都好難攞返出嚟, 根本乜嘢作用都冇.... 而且d風又响個門仔度走晒入嚟, 搞到呢個房仔特別凍. 所以呢度平時只係要嚟放玩具, 間中用嚟做吓客房.

咁呢個工程做d乜?? --- 係將半幅牆拆咗, 响屋頂斜落嚟嗰部分舖返好d隔熱保溫棉後再釘板, 將本來冇用o既地方, 整到可以放嘢, 之後再加返個趟門, 變做雜物櫃.

講好似好簡單, 不過之前都諗咗好耐, 到底整唔整好呢?? 要點樣整呢?? 識唔識整呢?? 整完會得到幾多位用呢??..... 其實都係邊做邊諗, 摸摸吓咁整出嚟, 正所謂船到橋頭自然直嘛!!!

最難o既, 應該係度趟門. 之前响catalogue度見到可以因應不同尺寸而訂做, 以為好簡單啦. 點知所有路軌都係8-9cm闊, 而我哋只可以放最闊5.5cm, 夾硬放8cm路軌o既話, 就會突晒出嚟, d角位仲會好危險添. 我同老公每日下午都去唔同o既建築材料公司(Leroy Merlin, Castorama, Brico Dépôt, Bricoman, La Payre), 搵吓有冇啱size既門同路軌, 可惜每次都空手而回.

好彩, 後來老公自己用幾條鋼鐵, 又揼又燒焊咁自製咗上下兩條路軌, 再買咗三包木板條, 揼咗兩度門.... 搞點!!!!

未拆之前, 幅牆後面放唔到好多嘢. 首先要將個暖氣散熱板拆除 ↓

遷拆中 ↓

裏面好污糟, 隔熱保溫棉冇固定好 ↓

舖返好d隔熱保溫棉後再釘板 ↓

左邊個窿就係上手屋主開o既門仔 ↓

將木板與木板之間o既罅隙抿膠, 目的等d風吹唔到入嚟, 再將地面同木條掃漆, 咁就唔怕會俾剌插親手 ↓

搞掂!! 個暖氣散熱板放咗去右邊 ↓

呢個雜物櫃可以通到去隔離房, 依家可以放到唔少嘢喇!!!

2011年3月26日星期六

太陽能發電板 (續)

2011年3月25日(星期五)

上回講到响2010年9月25日(太陽能發電板), 以一日o既時間就安裝好十四塊太陽能發電板.... 足足等咗六個月, 電力公司d人都嚟過三次, 正式駁好晒所有電錶同電線, 從今日開始, 終於可以收集電能喇!! 唔知我哋條頸長咗幾多吋呢???

介紹吓呢十四塊板有乜用途啦!! 故明思意, 係收集太陽能用嚟發電啦!! 不過其實唔係發電俾我哋自己屋企用架, 主要係幫電力公司收集電能, 然後再將d電能賣返俾電力公司, 每賣一度電係0.46歐元, 太陽越猛, 收集o既電能就越多.

點解唔自家用?? 因為唔夠力for成間屋咁多電器一齊用. 而且我哋用o既電, 係平過賣俾電力公司o既價錢. 照我哋同電力公司o既合約 --- 由朝早八點至夜晚十一點五十九分係 heures pleines, 每度電0.0901歐元; 由凌晨十二點至朝早七點五十九分係heures creuses, 每度電0.0557歐元.

所以我哋會盡可能, 响heures creuses時段用電, 例如: 將洗衣機電插座放時間開關器, 校到朝早五點半洗衫, 咁一起身就可以晾啦!! 儲滿個洗碗碟機後, 就响凌晨十二點幾開機 (好在我哋係夜鬼啫). 有時第二朝想食麵包, 就將d材料放晒入部麵包機 (部機成千幾W電架, 又要三個半鐘先整好), 校到四點自動開機, 咁朝早起身, 就有新鮮麵包出爐喇喂....