再戰angry birds蛋糕

2012年12月8日(星期六)

12月5日係壞人嘅四歲生日, 今晚响我哋屋企搞生日會.



之前Windy (壞人媽咪)話壞人近期都好鐘意angry birds, 所以我決定再向angry birds蛋糕挑戰, 整隻氹吓佢開心.

天欣生日時嗰隻整到好似貓頭鷹, 又溝唔到紅色, 所以今次我上網搵咗好多angry birds相做參考, 仲專登响ebay買咗d食用色粉, 尤其係黑色同紅色, 為求今次呢個會成功.... 加上有天悅幫眼(邊整邊睇吓似唔似), 真係好在有佢响度, 因為係佢話我知, 仲差頭頂上嗰兩條羽毛, 加咗之後, 又真係似模似樣呢!! 



當然除咗我隻angry birds之外, 仲有Windy整嘅蛋糕啦!! 糕面個圖案, 係佢响網上訂架, 寄嚟時就好似一張print好圖案嘅A4紙咁, 只雖要對準個蛋糕舖上去就ok, 真係零失敗呀!! 我第一次知道有d咁方便嘅嘢咋, 大鄉里....  

今晚唔算有好多款嘢食, chips, pizzas, nuggets, 汽水, 雪糕, 蛋糕..... 但勝在每款都夠多, 所以食到個個都捧住個肚, 仲淨返好多雪糕食唔晒添!! 班細路都玩得好開心.

 



 

 

 

生日快樂呀壞人!!

 

學校聖誕禮物 2012

2012年12月21日(星期五)

又到咗放兩個星期聖誕新年假嘅時候喇, 今年最後一日返學, 照例會有响學校整嘅禮物攞返嚟 ---  

天慰嘅.....

天欣嘅.....

天樂嘅.....

聖誕佈置 2012

2012年12月6日(星期四)

終於, 我都o的起心肝, 買過另一棵聖誕樹喇!!! 點解?? 因為以前嗰棵唔係好靚, 又瘦又成日跌d白色噴噴泡沬落地, 每日至少要吸一次, 好麻煩.

今年呢棵我就好滿意, 夠晒肥仔, 又冇嘢跌.... 買嗰陣見個價錢牌標價49,99€, 俾錢時發現原來大減價, 賣35€咋, 好嘢, 有著數!!

今次砌樹同以往唔同, 因為成棵樹都係班細路砌架!! 我完全冇幫過手, 相信出年可以退休喇.... 唔信??

 

 

真係個個都有幫手架, 連天禧都有份.... 搞搞震

 



掛裝飾都係佢哋搞嘅, 不過後來夠鐘返學, 淨底嗰d就由我嚟finish喇!!



至於門口呢.... 就係我一個人, 响零度嘅低溫之下, 用咗兩個鐘頭先完成架, 雖然唔係好靚, 收住貨先啦!!

預祝大家"聖誕快樂"呀!!!

白費心機!?

2012年12月2日(星期日)

今日係教會一個好朋友生日, 所以琴晚整咗個蛋糕, 諗住今朝去教會時送佢一個"surprise".

個蛋糕整到凌晨兩點, 完成之後, 我將佢好小心咁放入個蛋糕盒入邊, 之後就好安心咁去瞓覺喇!!!



第二朝, 班細路食早餐時, 我打開個蓋俾佢哋睇吓隻蛋糕. kum返個蓋時, 咁啱個計時器响, 提醒我要熄個暖奶樽器.... 就係咁, 做得一樣唔做得第二樣, 熄完個暖奶樽器後, 唔記得繼續去kum好個蛋糕盒蓋.

夠鐘走人, 一拎個蛋糕盒 --- 成隻蛋糕反轉跌咗落地下....  
今次真係唔慌唔"surprise"呀(for me)!!!

好地地一個蛋糕, 俾我搞到咁嘅樣, 唉....

冇辦法啦!! 唯有我哋自己食返囉!! 好在我屋企有班化骨龍 .... 又好在佢哋唔介意個蛋糕跌過落地, 睇佢哋食得幾滋味就知啦!!

教會位姊妹又點呢?? 我梗係將件事原原本本咁話過佢知, 仲有相為證添. 佢話: Ce n'est pas grave, l'intention est bien!! (唔緊要啦, 動機/原意係好嘅!!) 之後佢要求我send嗰幅蛋糕相俾佢, 雖然冇得食, 但望到都開心喎!!

其實响呢件事情上, 真係好似"白費心機"咁, 但又好似嗰位姊妹話齌, l'intention先至係最緊要. 而且最後, 我哋自己又有餐食.... 唔知可唔可以話係"塞翁失馬, 焉知非福"呢??

餐巾拼貼玻璃碟

2012年12月8日(星期六)

 

一個星期前, 見到yahoo人氣精選有篇blog介紹餐巾拼貼玻璃碟, 不過係人哋俾錢去學, 材料連教授好似要兩佰幾蚊.

我覺得一隻平平無奇嘅透明碟, 托上咗靚靚嘅餐巾之後, 真係突然變得好似藝術品般升價百倍....

咁啱得咁轎, 今日教會嘅慈助會活動, 就係教人點樣整呢個餐巾拼貼玻璃碟呀!! 免費而且送材料, yeah....

原來真係好簡單架, 材料只需要一隻透明玻璃碟, 一張靚餐巾, 白膠, acrylique白油, 掃一枝.

最好先將碟洗淨抺乾, 响碟底塗上第一層白膠, 將餐巾舖上, 再塗上第二層白膠, 乾透後塗上第一層白油, 乾透後再塗上第二層白油, 乾透後再塗上最後一層白膠, 完成.

總共係要塗五層(白膠, 白膠, 白油, 白油, 白膠); 餐巾只要有圖案薄薄嗰張, 第二三層白色襯底嗰d唔要; 想快d乾, 可以用風筒; 等完全乾透後就可收邊 ===>>>> 靚晒

 

  

老公知道我對呢個玩意好有興趣, 專登買咗兩盒透明玻璃碟俾我.

呢兩隻係我自己响屋企整架, 真係好靚!!!