2011年2月9日(星期三)
光污染, 真係好影響睡眠o既素質.
而我自己亦好怕訓覺時俾d光瞪住雙眼, 所以每朝當太陽光照到窗口時, 我就會開始訓得好差. 尤其係如果下晝想訓吓晏覺, 一係背住個窗訓, 不過唔轉身又唔舒服, 一係用條毛巾遮住雙眼, 始終都係訓得唔好. 其實可以柵volet, 但吓吓都要打開個窗, 伸出半個身去拉嗰兩隻volets入嚟, 用完又要推返出去勾好, 好似好大工程咁, 而且柵咗成間房又變得漆黑一片, 伸手不見五指, 呢種感覺我又唔係好鐘意.... 總之就係煩啦!!!
仲有呀!! 夜晚間房開著燈時, 硬係覺得人哋望得到入嚟, 好冇私隠咁....
之前有換窗公司o既人嚟推銷過佢哋d好巴閉o既頂級搖控開關volet, 講到d用料天上有地下無, 仲話可以用足一世都唔爛.... 一世喎!! 佢唔爛我都厭啦!!! 仲要兩千歐元, 唔值唔值!!!
有諗過想裝百葉簾, 又未搵到啱o既尺寸, 又怕有塵難清潔.
最近剿返幅布簾, 係以前舊屋個廳窗用開, 後來因為將d木框窗換過晒做pvc框, 就連個鋁質volet都換埋pvc, 幅布簾尺寸就唔再啱用, 仲俾我打咗入冷宮添.... 既然佢又出返嚟, 即管試吓個size啦.... 咦?? 長度又啱啱好喎!! 濶就係濶咗好多, cut咗佢都ok喎!!! 而且呢隻布料都唔算薄, 就算遮唔晒d太陽光, 起碼都會另到間房暗d, 肯定人哋又望唔到入嚟.
用咗兩三個鐘, 終於修改啱個尺寸, 放返晒d勾勾同圈圈, 燙好.... 剩係等老公得閒幫我据條軌同安上去.
三日之後....
終於大功告成!!!
我都幾滿意.