2012年2月28日(星期二)
早上11點幾, 叮咚..... 郵差先生終於捧住我上星期上網買o既"玩具"叫我簽收喇!!! Yeah.... 等咗幾日, 真係等到頸都長晒. 所謂既玩具, 就係我部KitchenAid攪拌機. 買呢部機主要既目的係要嚟搓麵團, 因為最近愛上左整麵包. 冇辦法啦!! 人在異鄉, 真係好掛住香港既麵包, 尤其是我自己有五年冇返過香港, 所以咪上網學吓點樣整囉!! 每當成功整出鬆軟好食既麵包時, 見到班細路食得好滋味, 自己又會覺得好開心同好滿足.
但係搓麵團呢個工序真係要用好多時間, 由其係加左牛油之後, 真係搓到頸梗背痛, 個麵團都未可以拉出薄膜. 所以就決定要買部機返嚟幫幫手喇!!
收到部機冇幾耐, 我就開工喇!!! 果然, 真係一分錢一分貨, 部機好靜, 因為夠重而唔會郁嚟郁去, 而且大約30分鐘, 就搓出又滑又靚既麵團. 真係一d都冇後悔買呢個牌子. 亦不枉我用左兩日時間上網搜集資料.
第一次做既功課, 就係呢d奶油餐包仔喇..... 好成功兼好好味啊!!!!!!!