拾不得你

2013年2月26日(星期二)

五個月前, Mamie Catherine離開咗我哋... 今日下午六點, 你又離我哋而去.

雖然大家都知道你時日無多, 大家都做好心理準備, 但當真係接到呢個消息時, 仍然好難過, 好難過, 好難過....

記得印象中第一次見到你, 係十三年前, 大家忙住幫Sabrina搬屋. 七十高齡嘅你, 仍然有氣有力, 落手落腳, 一d都冇偷懶, 不禁對你樂於助人嘅積極態度好欽佩.

多謝你, 對我哋一家嘅照顧; 多謝你, 為我哋所做過嘅一切; 多謝你, 所作基督門徒嘅榜樣; 
特別要多謝你, 將你媽咪留低嘅褔字鍊咀送俾我; 多謝你, 總是記得我. 多謝你, Michel, 你永遠係我心目中嘅爺爺, 我愛你!!


   

全家幅

2013年2月24日(星期日)


今日响教會, 天慰劃咗幅畫拎嚟俾我睇, 佢話係我哋嘅全家幅喎！

我: 點解咁多人嘅？你係咪計錯數呀?

天慰: 唔係, 得我哋七個之嘛！

我: 唔係喎, 有九個人喎！？

天慰: 等我話你知啦, 上面係鴨鴨, 蝸牛, 天禧. 下面係天悅姐姐, 天樂哥哥, 雪人, 我, 媽咪, 爸爸, 天欣.

我: 哦！ 點解我咁大個嘅？

天慰: 係呀！ 你係大人吖嘛！

我: 咁點解爸爸又細過我嘅?

天慰: 冇位吖嘛！

其實我相信係因為我响佢心目中嘅地位係大過爸爸就真, 哈哈, 心裡有d高興添…

我: 又點解你比姐姐哥哥仲要高呢?

天慰: 因為我鐘意囉！

原來如此@@

Anyway，我覺得呢張全家幅好靚, 值得影相留念. 

情人節禮物 2013

2013年2月14日(星期四)

今年既情人節, 我送俾老公既禮物係....

 係咩呢??

就係呢個 portable external hard disk喇!!

點解會買呢個嘢?? 原因係上星期六, 因為插錯火牛而燒咗舊嗰個hard disk囉!!

見到老公好苦惱咁既樣, 咪決定買返個新既俾佢, 氹吓佢開心啦!!

雖然入面既資料冇晒, 但唔緊要啦, 舊既唔去, 新既唔嚟嘛(唯有咁諗....)!!

天慰四歲生日

2013年2月5日(星期二)

今日係天慰四歲生日, 一早去返學時, 帶埋琴晚整到一點幾嘅蛋糕同糖返去, 準備同班同學仔一齊分享.

 

行到半路突然落大雨, 搞到我哋好似落湯雞咁.

留低咗部相機俾老師, 請佢幫忙影相....

 

 

收到咁大份禮物真係開心.

夜晚一家人慶祝冇整蛋糕, 不過就整咗個galette des rois, 因為天慰想食.

今日第二次有人為佢唱生日歌, 真係幸福.

 

結果俾天欣搵到個fève.

 

生日快樂呀天慰!!

失策

2013年2月1日(星期六)

琴晚請客, 焗咗個flan做甜品.

其實已經焗好, 仲上埋碟添, 但想個面燶少少, 咪連碟再放返入爐焗多陣囉!!

點知..... 唉, 大鑊!!

呢隻碟好有紀念價值, 係想當年我同老公南下歐遊時, 响意大利米蘭買架(買唔起名牌袋, 買隻碟都好啦)!! 勁心痛....